N^o 888.
R. Moray à Christiaan Huygens.
16 septembre 1661.

La lettre se trouve à Leiden, coll. Huygens.

A Whitehall ce 6. Septembre 1661.

Monsieur

Ma derniere1) vous a donne aduis de deux liures que J'ay donné a Monsieur le Cheualier Swan pour vous apporter: mais Je trouue qu'il n'est point encore party: il dit pourtant qu'il partira auec la premiere commodité: Je vous ay aussi enuoyé un autre il y a, Je crois, un mois. mais Monsieur d'Oldenbourg me dit, que vous ne l'auez point encore receu. Mais J'appris hier qu'il y a un espece de Mart Schut2), qui va tous les 15. iours une fois, entre Rotterdam et Londres. Si cela est, donnez moy quelque adresse à Roterdam pour y faire tenir les liures, et autres choses que J'auray a vous enuoyer: et ainsi nostre commerce sera bien asseuré. Et

sil vous plaist d'adresser tout ce que vous aurez à menuoyer selon ce billet3), il me sera tousiours rendu. Tout ce que Je vous diray d'auantage à present, est que Mercredi dernier4) Monsieur le Cheualier Digby nous presenta une lettre5) que Monsieur de Frenicle luy a escritte, touchant quelque phenomenes &c. de Saturne. dans laquelle trouuant que vous estes nommé, J'ay creu estre obligé de vous la communiquer, et partant vous en enuoye cy ioint la Copie6). J'auray aussi la semaine prochaine, Dieu aidant quelque autre chose à vous envoyer. Je suis du meilleur de mon Coeur

Monsieur

Vostre tres humble & tres obeissant serviteur, R. Moray.

Je n'ay pas eu le loisir de lire la Copie de la lettre cy iointe. Si vous y trouuez des fautes, faites le moy sçauoir, et Je les corrigeray.

A Monsieur Monsieur Christian Hugens de Zulechem A la Haye.

2 β

XX