N^o 930.
J. Chapelain à Christiaan Huygens.
20 décembre 1661.

La lettre se trouve à Leiden, coll. Huygens.

Monsieur

Je respons tard a vostre lettre du 7. Nouembre1) dernier par ce que jattendois tousjours d'auoir veu Monsieur vostre Pere et Monsieur vostre Frere et dauoir leu ce que vous auiés escrit a Monsieur Theuenot sur les Objections faittes par Monsieur Frenicle a vostre Systeme de Saturne. En fin j'ay veu cet excellent Homme a qui vous deués le jour et a qui le Monde est encore redeuable d'autres productions qui ne luy font point de honte non plus qu'a vous. Il ma fait lhonneur de me visiter a son retour2) de Fontainebleau en la compagnie de Monsieur Beuning l'vn de vos Ambassadeurs Extraordinaires en cette Cour, et la conuersation qui fut assés longue et assés diuerse me fit remarquer en luy vn si grand fons de richesses spirituelles que je m'estonnay moins en suite de celles que jay reconnües en vous et qui y sont coulées dvne si abondante source. Je feray tout ce que je pourray pour profiter de sa communication tout le temps que ses affaires le retiendront icy et pour eclairer mes tenebres par ses lumieres, afin de me rendre plus digne de luy et de vous. J'ay aussi veu apres vne longue attente vostre lettre3) a Monsieur Theuenot sur le Systeme, et suis demeuré fort satisfait de la response que vous y faites aux Oppositions de son Ami. me paroist fort probable ce que vous dites que plus les Telescopes sont parfaits plus lObseruateur est eloigné de se tromper et plus il approche de la Verité, ce que vous prouues bien en ce cas particulier par ces quatre phases diuerses et plus distinctes et approchantes de celle que vostre lunette vous a fournie, a mesure que ljnstrument est plus long et plus parfait, les posterieures se monstrant tousjours plus desmeslées et plus reconnoissables que les anterieures. Ce bon homme de Monsieur Frenicle auant qu'il eust veu vostre lettre4) du 14. Juillet dernier chés Monsieur Theuenot ou il se rencontra le jour que je la luy fus communiquer auoit desja quelque soupçon que lAnneau comme vous l'aués supposé ne faisoit pas leffet que vous pretendés et lorsqu'il y vit le changement que vous apporties a la raison des Diametres du Globe de Saturne et de son Anneau il s'imagina que cette variation là le deuoit confirmer dans son doute ce qui luy fit escrire a Monsieur Digby la dessus ce que vous aues leu dans la copie5) de sa lettre que ce Milord6) vous a enuoyée. Je n'ay point veu

cette lettre et ne scay du tout point quels sont ses motifs de douter; mais par la vostre a Monsieur Theuenot je pense voir que de linspection de la vostre du 14 juillet a moy il a mal tiré la preuue de sa reprehension. Car la figure de la phase de Saturne obseruee par vous cette presente annee y est telle que je vay tascher de vous



la figurer grossierement, en sorte que le Globe napproche ni dessus ni dessous ni aux costes du Cercle de l'Anneau de sorte que s'il se fonde pour vous combattre sur l'approche du Globe au Cercle de lAnneau il s'est absolument trompé et a raisonne sur vn faux fondement, ce qui ne seroit pas d'vn homme de ce merite. Ce que je vous puis assurer toutesfois c'est qu'il ne l'a fait ni par malignité ni par enuie, car c'est vne ame innocente et tres eloignée de chercher de la reputation aux despens d'autruy. Cette mesme simplicité la fait tomber dans vne plus grande faute et que je n'excuse point, qui est d'en auoir escrit son auis bon ou mauuais a d'autres qu'à vous, et d'auoir par la donné occasion aux Anglois de hesiter sur des choses que vous auiés si bien establies. Mais le mal est petit et s'il a causé du scandale il tournera a vostre gloire, puisque ses objections ne vous ont pas fait changer d'auis et que vous ne vous tenes pas moins assuré de vostre fait apres les auoir considerées. Ce qui me semble necessaire maintenaint, puisque cela a eclaté c'est de donner au Public vos Responses sur ses Oppositions que vous aués fait sur celles d'Eustachio de Diuinis, autant pour n'abandonner pas la verité que pour n'y laisser pas du vostre. car vous scaués que l'Enuie est lombre inseparable des grands Luminaires et que les nuages s'eleuent par la propre force de leurs rayons pour essayer de les offusquer. Il les faut vigoureusement dissiper, mais sans aigreur et sans immodestie à quoy vous n'aurés pas de peine, et en repoussant ciuilement ses attaques vous ne ferés que suyure la douceur de vostre naturel. Quant a lesperance que nous auions de vous reuoir icy auec Monsieur vostre Pere, quoy que nous ayons eu beaucoup de douleur de la voir deceue, il nous en faut pourtant consoler dans la pensée que vous employés vtilement le temps que vous ne nous aués pas donné et que le Public se trouuera bien de nostre perte. J'ay impatience de voir vos dernieres meditations sur l'Horloge et par auance je vous felicite de l'accroissement qu'aura receu cette admirable jnuention par vos heureuses veilles. Je vous enuoyay auec ma derniere7) vne epistre latine8) de Monsieur de Neuré ou il vous faisoit vne priere sur cette matiere. Je vous prie de m'en faire vn article dans vos premieres, lequel je luy puisse monstrer, si vous n'aués pas loysir de luy respondre vous mesme car il est persuadé que j'ay negligé de vous faire tenir la sienne.

Vous m'aués obligé d'enuoyer la mienne9) a Monsieur Heinsius dont j'estois

en vne extreme peine. Depuis j'en ay receu deux de luy ou il se plaint que depuis six mois il na eu ni de mes nouuelles ni des vostres. Les Exemplaires de son Ouide10) m'ont esté rendus et j'en ay fait la distribution presque entiere. Ceux11) de Monsieur Huet pour vous et pour Monsieur Vossius auec le liure de Dioptrique12) que jauois mis sous vne mesme enueloppe entre les hardes de Monsieur de Thou13) croyant qu'il partiroit de jour en jour ont este retirés par moy sur l'incertitude de son depart et mis entre les mains de Monsieur de Viquefort qui en a grossi sa balle. Ils ne vous pouuoient estre enuoyés par vne voye plus seure que celle la: Monsieur de Monmor fit porter ches Joli14) libraire les Poesies Latines15) du defunt Pere Mambrun16) pour vous en regaler. Nous chercherons vne commodité pour le paquet de Monsieur Huet a la Reyne Christine. J'apprendray de Monsieur vostre Pere ce que cest que vostre Machine pour le Vuide à l'enui de Monsieur Boile. Ce ne peut estre rien que d'excellent venant de vous. Vous deués quelques marques de vostre souvenir a Monsieur Ampiou17) Conseiller de la Cour qui vous conserue tousjours vne place fauorite dans le sien et qui vous escriuit18) a Londres. Je suis

Monsieur

Vostre treshumble et tresobeissant seruiteur Chapelain.

De Paris ce 20. Decembre 1661.

A Monsieur Monsieur Christianus Hugens de Zulichem Gentilhomme Hollandois A la Haye.