N^o 975.
[E. Maignan] à [M. Thevenot].
[février 1662.]
Appendice au No. 974.

La lettre se trouve à Leiden, coll. Huygens1).

Il faudroit qu'elle fust polie pour reconnoistre s'il y a des ondes a cause que s'il y en a on a perdu le temps de le trauailler et gaste la forme; quand à la coulleur de cette matiere la meilleure c'est le blanc et qui aye lē brillant fort vif. Le Verdunculo comme dit l'jtalien et Lauinatello sont de la seconde bonté comme aussy le Turquino, pourueu qu'ils soient peu charges de coulleur, et qu'ils brillent. Vous pouuez aseurer à Monsieur Heugens que la façon de faire les formes que J'ay expliquées dans la Perspectiua Horaria2) est celle dont je me suis toujours seruy et me sers encore et qui a esté jugée par cet Autheur Italien3) que vous me sistes voir la meilleure et la plus aseurée qui ait esté inuentée, sy elle comme il

adjouste pouuoit réüssir & il croid qu'elle ne peut pas réüssir, par ce que en faisant l'essay ne luy a pas réüssy, je ne scay pas comment il s'y est pris mais il m'a tousjours parfaitement réüssy à moy & je vous diray que pour degrossir la piece de metal quand elle est sur le tour jl faut mener le tour bellement et neantmoins auec assez de force pour emporter quoy que lentement le plus grossier, car il est manifeste qu'allant fort viste le poinçon d'acier qui doibt trancher s'êmousse en s'eschauffant et de plus est rejetté par la vistesse et dureté de la platine, voire mesme la platine sy elle n'est d'une espaisseur comme d'un poulce se fausse et faict le coup de poinçon à cause de la vistesse mais allant lentement & neantmoins auec une force suffisante on remédie à cet inconuenient et puis quand la forme a desjà pris sa figure quoy que rude par ce moyen on luy oste les rudesses & la rend on parfaictement unie et lissée auec l'egalité qu'il faut, en menant le tour viste et tenant le poinson en telle sorte qu'il prenne fort peu, on dîra que cela est long et je dis qu'il vaut mieux long et bon que court et mauuais. J'ay faict faire a Paris des formes que le frere Isaac m'a enuoyé depuïs peu. en l'une des quelles j'ay remarqué dans son Creux quatre petites esleuations qui prouiennent de la susdicte vistesse. voila sincerement la façon dont j'ay tousjours usé pour faire mes formes et jmpreuue fort ceux qui pour egaller les rudesses que le tour y a laissé prennent un grez moins grand que la forme et la frottent auec cela, je ne trouuerrois pas sy mauuais qu'on y appliquast un grez qui est4) une convexité a peu pres pour se joindre à la concauité de la forme pourueu qu'il y fust plus grand qu'elle ou du moins presque égal. en ma façon de tourner jl n'y reste aucune rudesse qui aye besoin de grez ou qui puisse nuïre a la perfection du trauail du Cristal.