N^o 872.
Ism. Boulliau à Christiaan Huygens.
11 juillet 1661.

La lettre se trouve à Leiden, coll. Huygens.
Elle est la réponse au No. 865.

A Warsauie le 11. Juillet 1661.

Monsieur Christian Hugens.

Monsieur

Je receus il y a 8. jours la letrre que vous m'auez faict la faueur de m'escrire de la Haye le 13^e. du passé; Je vous en rends graces treshumbles, & de toutes les choses curieuses qu'elle contient, & principalement l'obseruation1) que vous auez faicte de la conjonction de Mercure auec le Soleil. J'estois alors en chemin venant de Dantzigt en cette ville, & ainsi je me suis trouué priué de ce rare & curieux spectacle. ma consolation est que de vostre costé vous l'auez obserué, & Monsieur Heuel aussi, mais c'est auec plus de succez que vous; ayant eu vn temps plus beau, & tous les instrumens necessaires pour en venir a bout. Il ne manqua pas de m'en aduertir des le 5^e. May sans m'en escrire les particularitez & circonstances. seulement m'at il fait scauoir que Mercure luy apparut dans le disque du Soleil a 3. heures apres midi esloigné du bord denuiron 1/8 du diametre, & par les aurtes suiuantes il conclud que Mercure enrta dans le Soleil a 2. heures apres midy, que le milieu de cette conjonction fut a 6. heures & la sortie a 10. heures du soir. Il en promet vne description en cuiure2) quil fera imprimer. Mes Tables Philolaiques represent3) lentree le 3^e. May a Hora 10′48″42 du matin, trois heures seulement auant qu'elle ayt commencé, & celles de Kepler Rudolfines donnent l'entree le 3^e. a 2. heures 48′12″ du matin. Kepler & moy faisons la Latitude Septentrionale, & cependant elle a paru a Monsieur Heuelius & a vous Meridionale. J'ay de quoi me satisfaire, mon trauail ayant esté assez heureux que de reussir si pres en Mercure, dont l'on a si peu d'obseruations. Monsieur Heuelius la obserué moy present le mois d'Auril passé auec vne exactitude nompareille, prenant la distance des fixes & de ☿ par le moyen de son grand Sextans.

Pour satisfaire a vostre curiosité je vous feray part icy de ce que j'obseruay a Hambourg, ou je veids la Comete le Jeudi 10. Feurier passé. Hora 5. matutina. auec vne Lunette d'approche je la consideray proche de la petite estoile, quae est in

collo vel capite Aquilae, a qua Stellâ distabat noui huius Sideris ora superior. ′32. vt plurimum, erat inferior illa stellâ fixâ, quae sub cauda cometae et intra illam lucebat. Azimuthum Cometae erat orientalius Azimutho Stellae ′6. vt plurimum. Ex distantia & azimutho obseruatis simulque Altitudine poli grad. 53.′43. data, loco etiam fixae ex Tychonis abaco in ♒ grad. 0 ′19.″34. Latitudine Boreali grad. 27.′8 deduxi Cometae locum tunc fuisse in ♒ grad. 0.′40. et in Latitudine Boreali grad. 26.′38.″40.

Eodem tempore obseruabat Dantisci Dominus Heuelius distantias Cometae a fixis α Lucida Lyrae grad. 37.′40.″20. a Cauda Cygni grad. 39.′7.″20. Ex quibus Longitudo Cometae deducitur in ♒ 48′.17″. & Latitudo Borealis grad. 26.′38.″13. Sed locus paruulae in collo Aquilae est promotior, quam a Tychone ponitur. estque in ♒ grad. 0.′24.″24. jta vt Cometa fuerit in ♒ grad. 0.′45. fere in obseruatione Hamburgensi. Je m'estonne de ce que Messieurs nos Doctes & Illustres de Paris ne layent pas veüe; quels philosophes? a moins que le ciel ayt esté continuellement couuert, on leur pardonnera jamais cette negligence.

Monsieur Heuelius m'a fait voir la figure des parhelies qu'il a veus a Dantzigt cette annee, mais il ne veut pas la communiquer, il veut luy mesme la publier4) en temps & lieu; c'est pourquoj je ne peux satisfaire a vostre curiosité pour ce point la. Jamais peut estre l'on n'en a veu de si beaux & si notables. Jl a aussi veu des paraselenes, & des croix dans la Lune; De tous ces meteores & des Cometes il prepare de beaux grands Commentaires5) & vn Catalogue6) des estoiles fixes, & j'espere que dans 3. ans nous aurons le tout imprimé.

Le 16. Auril veille de Pasques a 8. 3/4 du soir nous veismes tomber en lair vn Meteore, qui au commencement ne paroissoit pas plus grand que ces estoiles tombantes, appelees par les grecs ἄστρα διάττοντα & elle grossit a la veue de sorte qu'au point qu'elle s'esteignit elle parut grosse comme vne bale de canon de 48. liures, elle s'esteignit tout d'un coup & bien haut en l'air. Elle a esté par toute la Prusse & Pomeranie.

Le vendredi 13. May j'obseruay icy la ☾ qui passa pres de Saturne & lors que la queue du Cygne estoit eleuee de 44. grad. ′55. obseruee par vn quadrant qui marque les minutes, ♄ & le centre de la ☾ estoient en mesme azimuth. & le bord superieur de la ☾ estoit distant de ♄ pres de 9′. autant que je le pûs juger auec la Lunette d'approche. Monsieur Heuelius m'a escrit que la distance a Dantzigt ne luy auoit paru que de 6′. & je pourrois bien auoir manqué en quelque 2′. le Pole de Warsauie est esleué de 52^o. 16′. ou 17. jay obserué cette annee le 20. & 22. Juin les Hauteurs du Soleil meridiennes, le 20. grad. 61.′14.″30. Le 22. 61.′14. Monsieur des Noyers7) obserua le 21^e. 61 grad. 15′ fere mais je ne vous certifie pas ces hauteurs jusques a 2. minutes d'erreur.

J'ay bien eu du regret de n'auoir pas apporté auec moy les verres de vostre façon, que vous m'auez fait l'honneur de menuoyer a Paris il y a 3. ans, je les eusse comparez auec ceux de Monsieur Heuelius. mais j'ay eu peur qu'il n'y arrivast quelque accident.

Je ne manqueray pas lors que je seray de retour a Dantzigt de communiquer a Monsieur Heuelius la lettre8) a laquelle je fais response. Cependant je luy ay

enuoyé par auance la copie de l'obseruation que vous auez faicte de Mercure dans le Soleil.

Messieurs de l'Academie d'Angleterre nous produiront quelque chose de beau auec le temps, & je croy quils nous donneront de belles inuentions en matiere de Lunettes, Monsieur Heuel y trauaille aussi de son costé. Si l'on pouuoit persuader nos Messieurs de Paris, qui sont riches, curieux des belles choses, & desireux d'vne gloire jmmortelle, de faire quelque despense pour acquerir des cognoissances par les experiences, on pourroit esperer quelque chose. Mais ils veulent sans peine (sinon que celle que l'on met a faire de beaux discours & philosopher en lair) sans application & sans despense s'acquerir du plus beau & du meilleur. Vous l'auez veu par experience, & je ne vous en diray pas dauantage par escrit. j'en scauray vostre aduis a mon retour en Hollande, qui sera s'il plaist a Dieu en Septembre9).

Dans toute la Pologne il ny a que Il Signor Buratini10) qui est icy, Italien homme d'esprit, qui est curieux dans les Mechaniques, & qui a faict des lunettes de 8. pieds assez bonnes. Il en veut faire de 27 brasses de Florence, qui font plus de 40. pieds. Lon verra comme il y reussira.

J'ay aussi faict vos complimens a Monsieur Heuelius par la lettre que je luy escris aujourdhuy.

Au reste, Monsieur, vous me faites vn compliment que je ne reçois point, & vous me remerciez de ce que depuis mon depart de Paris je me suis donné l'honneur de vous escrire & de me souuenir de vous. Vous voudriez donc, Monsieur, que j'oubliasse les personnes de vostre merite, & que je negligeasse vostre amitié, laquelle m'est si auantageuse, & que je cheris vniquement. & encores vous pourriez croire que je ne conseruasse point les ressentiments de l'obligation que je vous ay. C'est pourquoy je vous supplie tres humblement de ne plus vser de tels complimens auec moy. Dans la lettre11) que je vous escriuis de la Haye en Decembre dernier, & que je portay a vostre logis, je vous donnois aduis que Monsieur Heuelius m'auoit escrit qu'il auoit obserué la nouuelle estoile in collo Ceti12) le mois de Nouembre precedent, qui est la mesme que Phocyllides Holwarda13) a veue & qu'il remarque dans son liuret jntitulé Πανσέληνος14). Jl faut prendre garde cet

automne si elle paroistra. Celle qui est in collo Cygni ne paroist quasi plus, jl s'est formé autour quelque matiere, qui fait paroistre la voye lactee plus blanche en ce lieu la; Monsieur Heuel m'a fait voir auec sa grande Lunette d'Augbourg de la façon de Viselius15), ce que vous auez obserué16) in ense Orionis; la chose est belle a regarder, & digne que l'on philosophe dessus.

Je vous supplie de faire mes treshumbles baisemains a Monsieur Vossius, a tous nos amis de Leyden & d'Amsterdam, & en attendant que j'aye l'honneur de vous voir a ce mois de Septembre je vous supplie de croire que je suis tres-veritablement

Monsieur

Vostre treshumble & tresobeissant seruiteur Boulliau.

A Monsieur Monsieur Christian Hugens de Zulichem A la Haye.