Cap. VI.
Vande Historie ofte materie waermen op sal mediteren; tweede deel vande Meditatie.

ALs de ziele nu met diepe eerbiedinghe haer heeft ghestelt inde teghenwoordicheydt van haeren Godt, ende haere meyninghe gerecht heeft dat sy anders niet en begheert noch en pretendeert in dat ghebedt, dan dat den liefsten wille Godts in haer volbracht zy, soo beghint sy op te vallen op die materie ofte Historie waer op sy begheert te mediteren, de selve overloopende met de ghedachten op de maniere als die ghebeurt is, 'twelck het tweede deel van de Meditatie, is, sonder als-noch die bewegelijckste circonstantien te wegen, het welck meer geschiet in't derde deel, maet hier en gedenckt sy maer die historie hoe dat sy geschiet is. By exempel den gene die vande bitter geesselinghe ons Salichmaeckers wilt mediteren, die ghedenckt hoe wreedelijck de soldaten onsen Salichimaecker oncleedden van sijn cleederen (door dien dat Pilatus gheenssins die Ioden en conde payen) ende doen hy nu in grooter beschaemtheydt

voor al dat volck naeckt was ghemaeckt, dat sy namen scherpe coorden waer mede sy sijn heylighe handen ende voeten vast bonden, daer naer twee oft vier van hun nemende wreede royen ofte sweepen hebben hem seer schroomelijck begonst te slaen ende te gheesselen sonder eenighe ghenade, soo dat sy al sijn H. Lichæm soo deerlijck opengehaelt hebben ende gescheurt, dat het dierbaer bloet van alle canten uytvloyende overvloedelijc opder aerde was loopende, 'twelck met de voeten vande wreede beulen ende soldaten sonder reverentie betreden wiert. Hoe oock dese onghenadighe soldaten niet te vreden en waeren van hem te slaen tot dat hun wraeckgiericheyt versaet was, maer hoe dat sy moede zijnde, andere versche in hunne plaetse quamen die Godt weder op een nieuw begonsten te geesselen. Op dese maniere overloopt de ziele d'Historie vande Meditatie in't generael, waer toe helpt d'Historie te lesen voor't ghebedt alsmen die niet van buyten en can, namentlijck in’t beghinsel, alsmen eerst leert mediteren, 'twelck gedaen zijnde soo volght het derde deel van de Meditatie dat de Consideratie ofte overdenckinghe wordt ghenoemt.